…Ասել, թե Խաչատուր Ազիզյանը լույսի հանդեպ զգայուն է, թերի կլինի. այն քնարական իր ներշնչանքի պսակն է, որոնող և տաք խառնվածքը հավասարակշռողը, և երաժշտական իմպուլսներ ունի:
Առիթմիան պարզապես իրենը չէ: Լույսի ներկայությանը նա հասնում է ոչ միայն սպիտակի, նարնջագույնի կամ բոսորի օգտագործմամբ, այլ երանգաշարի ամբողջ սպեկտրի տիրապետումով, որպես օրինակ, ամենապաղ կանաչի, ամենապաղ կապույտի: Եվ լույսը ղողանջում է: Դանթեական թեմաներով նկարված «Դրախտում», որն սքանչելի է, կենաց ծառերի գըմբեթների, բարալիկ բների, կանանց ուրվախմբի, ձիու, հեծյալի, ծիլ ու ծաղկի վրա այլաձև և զանազան մեծության գունաբծերը ներդաշնակ բաշխելու եղանակով կերպավորման, հեռանկարի և լուսաստվերի աներկրային պատրանք է ստեղծում:
Ներսումդ դժոխք պիտի ունենաս դժոխք նկարելու համար:
Խաչատուր Ազիզյանը բնական ընտրություն է կատարել: Եվ իր ինքնության դրոշմը բացահայտ է:
Նրա հոգևոր տարածքներում ապրում է սերը, գեղեցիկը, խորհրդավորը: Հայաստան աշխարհն է` ըմբռնելի իբրև մարդկության բնօրրան, դարի տառապանք ու մահերով, հույս ու հարությամբ: Եվ լուսա-օդային միջավայրը պայման է, որպեսզի կյանքը հաղթանակի հենց այդ ճանապարհով:
ՇԱՆԹ ՄԿՐՏՉՅԱՆ